1ܘܟܲܕ ܐ݇ܬܹܐܠܹܗ ܦܹܗܸܣܛܘܿܣ ܠܩܹܣܲܪܝܵܐ؛ ܒܵܬ݇ܪ ܬܠܵܬ݇ ܝܵܘܡܵܢܹ̈ܐ ܐ݇ܣܸܩܠܹܗ ܠܐܘܿܪܸܫܠܸܡ. 2ܘܡܘܼܕܸܥܠܗܘܿܢ ܐܸܠܹܗ ܓܘܼܪܵܐ ܕܟܵܗܢܹ̈ܐ ܘܪܹ̈ܫܵܢܹܐ ܕܝܗ݇ܘܼܕܵܝܹ̈ܐ ܒܘܼܬܿ ܦܵܘܠܘܿܣ. 3ܘܒܵܥܝܝܼ ܗَܘܵܘ ܡܸܢܹܗ؛ ܟܲܕ ܒܸܛܠܵܒܵܐ ܐܵܗܵܐ ܫܵܦܵܩܲܬ ܥܲܠܘܼܗܝ؛ ܕܫܵܕܸܪ ܡܲܝܬܹܐ ܠܹܗ ܠܐܘܿܪܸܫܠܸܡ؛ ܟܲܕ ܥܵܒܼܕܝܼ ܗَܘܵܘ ܒܘܼܨܵܐ ܒܐܘܼܪܚܵܐ ܕܩܵܛܠܝܼ ܠܹܗ. 4ܘܦܹܗܹܣܛܘܿܣ ܡܘܼܕܸܪܹܗ ܓ̰ܘܼܘܵܒ ܕܦܵܘܠܘܿܣ ܦܝܵܫܵܐ ܗَܘܵܐ ܢܛܝܼܪܵܐ ܒܩܹܣܲܪܝܵܐ؛ ܘܒܓܵܢܹܗ ܡܘܼܠܝܸܙܵܐ ܗَܘܵܐ ܕܐܵܙܸܠ (ܬܵܡܵܐ). 5ܐܵܢܝܼ ܗܲܕܟܼܵܐ ܕܐܝܼܬ ܓܵܘܵܘܟܼܘܿܢ ܚܲܝܠܵܢܹ̈ܐ ܨܵܠܝܼ ܥܲܡܲܢ؛ ܘܐܸܢ ܐܝܼܬ ܓܢܵܗܵܐ ܒܐܵܗܵܐ ܓܲܒܼܪܵܐ ܡܵܚܝܼ ܕܲܪܗܲܩ. 6ܘܟܲܕ ܗ݇ܘܹܐܠܹܗ ܬܵܡܵܐ ܬܡܵܢܝܵܐ ܝܲܢ ܥܸܣܪܵܐ ܝܵܘܡܵܢܹ̈ܐ؛ ܨܠܹܐܠܹܗ ܠܩܹܣܵܪܝܵܐ؛ ܘܒܝܵܘܡܵܐ ܐ݇ܚܹܪ݇ܢܵܐ ܝ݇ܬܸܒܼܠܹܗ ܥܲܠ ܟܘܼܪܣܝܵܐ ܕܕܝܼܘܵܢ؛ ܘܦܩܸܕܠܹܗ ܕܡܲܝܬܹܐܠܹܗ ܠܦܵܘܠܘܿܣ. 7ܘܟܲܕ ܐ݇ܬܹܐܠܹܗ؛ ܟܠܹܐܠܗ݇ܘܿܢ ܚܵܕܸܪ̈ܘܵܢܘܼܗܝ ܝܗ݇ܘܼܕܵܝܹ̈ܐ ܕܨܠܹܐܠܗ݇ܘܿܢ ܡ̣ܢ ܐܘܿܪܸܫܠܸܡ؛ ܘܠܵܘܡܹ̈ܐ ܪܵܒܵܐ ܘܩܸܫܝܹ̈ܐ ܡܲܝܬܝܼ ܗَܘܵܘ ܥܲܠܘܼܗܝ؛ ܐܵܢܝܼ ܕܠܹܐ ܡܵܨܝܼ ܗَܘܵܘ ܠܡܲܚܙܘܿܝܹܐ ܡܸܢܕܝܼ. 8ܟܲܕ ܦܵܘܠܘܿܣ ܐَܡܸܪܹܗ ܒܓ̰ܘܼܘܵܒܹܗ؛ ܠܵܐ ܥܒܼܸܕܠܝܼ ܓܢܵܗܵܐ ܡܸܢܕܝܼ؛ ܠܵܐ ܒܢܵܡܘܿܣܵܐ ܕܝܼܗ݇ܘܼܕܵܝܹ̈ܐ؛ ܘܠܵܐ ܒܗܲܝܟܠܵܐ؛ ܘܠܵܐ ܒܩܹܣܲܪ. 9ܐܝܼܢܵܐ ܦܹܗܸܣܛܘܿܣ؛ ܣܵܒܵܒ ܕܒܵܥܝܹܐ ܗَܘܵܐ ܕܕܵܪܹܗ ܡܸܢܬܵܐ ܠܝܗ݇ܘܼܕܵܝܹ̈ܐ؛ ܓ̰ܘܼܘܸܒܠܹܗ ܘܐَܡܸܪܹܗ ܠܦܵܘܠܘܿܣ؛ ܒܵܥܝܸܬ ܐܵܣܩܸܬ ܠܐܘܿܪܸܫܠܸܡ؛ ܘܬܵܡܵܐ ܦܵܝܫܸܬ ܕܝܼܢܵܐ ܩܵܕ݇ܡܝܼ ܥܲܠ ܕܐܲܢܹܐ. 10ܐܝܼܢܵܐ ܦܵܘܠܘܿܣ ܐَܡܸܪܹܗ؛ ܥܲܠ ܟܘܼܪܣܝܵܐ ܕܕܝܼܘܵܢ ܕܩܹܣܲܪ ܒܸܟܠܵܝܵܐ ܝ݇ܘܸܢ؛ ܒܕܘܼܟܵܐ ܕܘܵܓ̰ܸܒ ܝ݇ܠܵܗ̇ ܐܸܠܝܼ ܠܸܦܝܵܫܵܐ ܕܝܼܢܵܐ. ܡܸܢܕܝܼ ܠܵܐ ܚܛܹܐܠܝܼ ܠܝܗ݇ܘܼܕܵܝܹ̈ܐ؛ ܐܲܝܟܼ ܕܐܘܼܦ ܐܲܢ݇ܬ ܨܦܵܝܝܼ ܟܹܐ ܝܵܕܥܸܬ. 11ܘܐܸܢ ܓܢܵܗܵܐ ܥܒܼܝܼܕܵܐ ܝ݇ܘܸܢ؛ ܘܦܠܝܼܚܵܐ ܝ݇ܘܸܢ ܡܸܢܕܝܼ ܕܚܵܫܸܚ ܠܡܵܘܬܵܐ؛ ܠܵܐ ܝܘܸܢ ܡܲܚܦܘܼܠܹܐ ܡ̣ܢ ܡܵܘܬܵܐ؛ ܐܝܼܢܵܐ ܐܸܢ ܠܲܝܬ ܠܟܸܣܠܝܼ ܡܸܢܕܝܼ ܡܐܲܢܹܐ ܕܒܸܡܚܵܝܵܐ ܝ݇ܢܵܐ ܕܲܪܗܲܩܝܼ؛ ܐ݇ܢܵܫܵܐ ܠܹܐ ܡܵܨܹܐ ܕܣܵܦܹܐܠܝܼ ܐܸܠܵܝܗܝ ܒܚܵܨܵܐ ܕܩܹܣܲܪ ܒܸܩܪܵܝܵܐ ܝ݇ܘܸܢ. 12ܗܵܝܓܵܗ ܦܹܗܸܣܛܘܿܣ ܗܘܼܡܙܸܡܠܹܗ ܥܲܡ ܡܵܘܬܒܼܵܐ ܕܕܲܝܵܢܹ̈ܐ؛ ܘܓ̰ܘܼܘܸܒܠܹܗ؛ ܒܚܵܨܹܗ ܕܩܹܣܲܪ ܒܸܩܪܵܝܵܐ ܝَܘܸܬ؛ ܠܟܸܣ ܩܹܣܲܪ ܒܸܬ ܐܵܙܹܠ݇ܬ. 13ܘܟܲܕ ܥܒܼܸܪܗ݇ܘܿܢ ܚܲܕَܟܡܵܐ ܝܵܘܡܵܢܵܐ؛ ܨܠܹܐܠܹܗ ܐܵܓܸܪܦܘܿܣ ܡܲܠܟܵܐ ܘܒܲܪܢܝܼܩܹܐ ܠܩܹܣܲܪܝܵܐ ܠܸܕܪܵܝܵܐ ܫܠܵܡܵܐ ܠܦܹܗܹܣܛܘܿܣ. 14ܘܟܲܕ ܦܸܫܠܗ݇ܘܿܢ ܠܟܸܣܠܹܗ ܪܵܒܵܐ ܝܵܘܡܵܢܹ̈ܐ؛ ܗܘܼܩܹܐܠܹܗ ܦܹܗܹܣܛܘܿܣ ܠܡܲܠܟܵܐ ܩܸܨܲܬ ܕܦܵܘܠܘܿܣ؛ ܟܲܕ ܐܵܡܸܪ؛ ܚܲܕ݇ ܓܲܒܼܪܵܐ ܐ݇ܣܝܼܪܵܐ ܦܸܫܠܹܗ ܫܒܼܝܼܩܵܐ ܡ̣ܢ ܦܝܼܠܸܟܣ؛ 15ܘܟܲܕ ܗ݇ܘܹܐܠܝܼ ܓܵܘ ܐܘܿܪܸܫܠܸܡ؛ ܩܲܡ ܡܲܕܥܸܝܼ ܠܝܼ ܒܘܼܬ ܕܝܼܹܗ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܕܝܼܗ݇ܘܼܕܵܝܹ̈ܐ؛ ܘܒܥܹܐܠܗܘܿܢ ܕܥܵܒܼܕܸܢ ܕܝܼܘܵܢ ܥܲܠܘܼܗܝ. 16ܘܓ̰ܘܼܘܸܒܵܝܗܝ ܠܝܼ؛ ܕܠܲܝܬ ܠܪ̈ܗ݇ܘܿܡܵܝܹܐ ܠܣܵܦܘܿܝܹܐ ܐ݇ܢܵܫܵܐ ܠܩܸܛܠܵܐ؛ ܗܲܠ ܗ̇ܘ ܕܦܵܐܹܫ ܡܸܚܝܵܐ ܕܲܪܗܲܩ ܘܥܲܡ ܩܵܒܼܠܵܢܹ̈ܐ ܗܵܘܝܼ ܦܵܬܵܐ ܩܵܕ݇ܡ ܦܵܬܵܐ؛ ܘܗܵܘܝܵܐ ܠܹܗ ܦܸܪܣܲܬ ܠܡܲܕܘܼܪܹܐ ܓ̰ܘܼܘܵܒ ܥܲܠ ܡܸܢܕܝܼ ܕܦܝܵܫܵܐ ܝ݇ܠܹܗ ܡܸܚܝܵܐ ܕܲܪܗܲܩ. 17ܗܲܕܟܼܵܐ ܟܲܕ ܐ݇ܬܹܐܠܗܘܿܢ ܠܲܐܟܼܵܐ؛ ܕܠܵܐ ܥܲܪܩܲܠܬܵܐ؛ ܒܝܵܘܡܵܐ ܕܩܵܝܕܲܡܬܵܐ ܝ݇ܬܸܒܼܠܝܼ ܥܲܠ ܟܘܼܪܣܝܵܐ ܕܕܝܼܘܵܢ؛ ܘܦܩܸܕܠܝܼ ܕܡܲܝܬܝܼ ܠܐ݇ܢܵܫܵܐ ܠܟܸܣܠܝܼ. 18ܘܟܲܕ ܩܸܡܠܗ݇ܘܿܢ ܡܲܚܝܵܢܹ̈ܐ ܕܕܲܪܗܲܩܹܗ ܠܵܐ ܡܘܼܚܙܹܐܠܗَܘܿܢ ܚܕܵܐ ܒܝܼܫܬܵܐ ܥܲܠܘܼܗܝ ܡܐܵܢܝܼ ܒܝܼܫܵܬܹ̈ܐ ܕܚܫܝܼܒܼܵܐ ܝ݇ܘܸܢ ܗَܘܵܐ 19ܐܝܼܢܵܐ ܚܲܕَܟܡܵܐ ܕܪ̈ܵܫܝܵܬܹܐ ܒܘܼܬܿ ܕܬܵܘܕܝܼܬܵܐ ܕܓܵܢܵܝܗܝ ܐܝܼܬ ܗَܘܵܘ ܠܗ݇ܘܿܢ ܥܲܠܘܼܗܝ؛ ܘܒܘܼܬܿ ܝܼܫܘܿܥ؛ ܐ݇ܢܵܫܵܐ ܕܡܝܼܬܠܹܗ؛ ܗ̇ܘ ܕܒܹܐܡܵܪܵܐ ܠܹܗ ܦܵܘܠܘܿܣ ܚܲܝܵܐ ܝ݇ܠܹܗ. 20ܘܣܵܒܵܒ ܕܐܵܢܵܐ ܠܹܐ ܡܵܨܸܢ ܠܨܲܚܨܘܼܝܹܐ ܥܲܠ ܕܐܲܢܹܐ ܫܘܼܠܹ̈ܐ؛ ܘܐَܡܸܪܝܼ ܠܦܵܘܠܘܿܣ؛ ܐܸܢ ܒܵܥܝܹܐ ܕܐܵܙܸܠ ܠܐܘܿܪܸܫܠܸܡ؛ ܘܬܵܡܵܐ ܦܵܐܹܫ ܕܝܼܢܵܐ ܥܲܠ ܕܐܲܢܹܐ. 21ܐܝܼܢܵܐ ܦܵܘܠܘܿܣ ܒܥܹܐܠܹܗ ܕܦܵܐܹܫ ܗَܘܵܐ ܢܛܝܼܪܵܐ ܠܕܝܼܘܵܢ ܕܩܹܣܲܪ؛ ܘܦܩܸܕܠܝܼ ܕܦܵܐܹܫ ܢܛܝܼܪܵܐ ܗܲܠ ܕܫܵܕܪܸܢ ܗَܘܵܐ ܠܹܗ ܠܟܸܣ ܩܹܣܲܪ. 22ܘܐَܡܸܪܹܗ ܐܵܓܸܪܦܘܿܣ؛ ܒܵܥܹܝܢ ܗَܘܵܐ ܐܘܼܦ ܐܵܢܵܐ ܕܫܵܡܥܸܢ ܠܐܵܗܵܐ ܓܲܒܼܪܵܐ. ܘܐَܡܸܪܹܗ؛ ܘܦܹܗܹܣܛܘܿܣ ܐَܡܸܪܹܗ؛ ܩܵܝܕܲܡܬܵܐ ܒܸܬ ܫܵܡܥܹܬ ܠܹܗ. 23ܗܲܕܟܼܵܐ ܒܝܵܘܡܵܐ ܐ݇ܚܹܪ݇ܢܵܐ؛ ܐ݇ܬܹܐܠܹܗ ܐܵܓܸܪܦܘܿܣ ܘܒܲܪܢܝܼܩܹܐ ܒܪܵܒܵܐ ܚܲܕܘܼܬܵܐ؛ ܘܥܒܼܸܪܗ݇ܘܿܢ ܠܒܹܝܬ ܕܝܼܘܵܢ ܥܲܡ ܪ̈ܲܒܐܲܠܦܹܐ ܘܓܘܼܪ̈ܵܢܹܐ ܕܡܕܝܼܢ݇ܬܵܐ؛ ܘܦܩܸܕܠܹܗ ܦܹܗܸܣܛܘܿܣ ܘܦܸܫܠܹܗ ܡܘܼܬܝܵܐ ܦܵܘܠܘܿܣ. 24ܘܦܹܗܸܣܛܘܿܣ ܐَܡܸܪܹܗ؛ ܐܵܓܸܪܦܘܿܣ ܡܲܠܟܵܐ؛ ܘܟܠܵܘܟܼܘܿܢ ܓܲܒܼܪܹ̈ܐ ܕܝܼܬܘܿܢ ܥܲܡܲܢ؛ ܥܲܠ ܕܐܵܗܵܐ ܓܲܒܼܪܵܐ ܕܒܸܚܙܵܝܵܐ ܝ݇ܬܘܿܢ؛ ܟܠܹܗ ܛܵܝܸܦܵܐ ܕܝܼܗ݇ܘܼܕܵܝܹ̈ܐ ܩܒܼܸܠܗ݇ܘܿܢ ܥܲܠܹܗ ܠܟܸܣܠܝܼ؛ ܓܵܘ ܐܘܿܪܸܫܠܸܡ ܘܠܲܐܟܼܵܐ؛ ܟܲܕ ܡܲܩܘܘܼܚܹܐ ܕܐ݇ܚܹܪ݇ܢܵܐ ܠܹܐ ܝ݇ܠܵܗ̇ ܘܵܓ̰ܸܒ ܚܲܝܹܐ. 25ܐܝܼܢܵܐ ܐܵܢܵܐ ܡܛܹܐܠܝܼ ܕܡܸܢܕܝܼ ܕܚܵܫܸܚ ܠܡܵܘܬܵܐ ܠܹܐ ܗَܘܵܐ ܦܠܝܼܚܵܐ؛ ܘܣܵܒܵܒ ܕܐܵܗܵܐ ܒܓܵܢܹܗ ܒܥܹܐܠܹܗ ܕܦܵܐܹܫ ܢܛܝܼܪܵܐ ܠܕܝܼܘܵܢܹܗ ܕܩܹܣܲܪ؛ ܕܸܢܝܼ ܕܦܵܐܹܫ ܫܘܼܕܪܵܐ. 26ܘܥܲܠܘܼܗܝ ܠܲܝܬ ܠܝܼ ܡܸܢܕܝܼ ܡܲܥܠܘܼܡ ܕܟܵܬܒܼܸܢ ܠܩܹܣܲܪ. ܣܵܒܵܒ ܕܐܵܗܵܐ ܡܘܼܝܬܹܐܠܝܼ ܩܲܕَܡܵܘܟܼܘܿܢ؛ ܘܙܵܘܕܵܐ ܩܵܕَܡ ܕܝܘܼܟܼ؛ ܡܲܠܟܵܐ ܐܵܓܸܪܦܵܐ؛ ܕܐܝܼܡܲܢ ܕܗܵܘܝܵܐ ܨܲܚܨܵܝܬܵܐ؛ ܗܵܘܹܐ ܠܝܼ ܡܸܢܕܝܼ ܕܟܵܬܒܼܸܢ. 27ܣܵܒܵܒ ܒܸܚܙܵܝܵܐ ܝ݇ܘܸܢ ܕܠܹܐ ܝ݇ܠܵܗ̇ ܘܵܓ̰ܸܒ ܕܟܲܕ ܫܵܕܪܲܚ ܐ݇ܢܵܫܵܐ ܐ݇ܣܝܼܪܵܐ؛ ܕܠܵܐ ܡܵܕܥܲܚ ܕܲܪܗܲܩ ܕܥܲܠܘܼܗܝ.